20180312✈阿聯酋杜拜｜杜拜博物館．了解杜拜崛起史

杜拜博物館(Dubai Museum)位於杜拜河岸(Dubai Creek)、布料市集(Textile Souk)附近，旅行團必經點之一。入場費平，而且內容豐富。即使唔識／唔想睇英文說明，淨係睇佈景都值回票價。

前一晚準備由香港飛杜拜，因為有乘客no show（意指有乘客本應要上機，但無出現）。為安全起見，職員要先喺貨艙將佢地既寄艙行李搵返出黎，結果又係搞到delay，凌晨深夜十二點先到。

休息夠既時候已經烈日當空，於是全日行程就係去郵局買特別郵票、hea遊博物館同舊市集。

入館前先喺對面既一間小餐廳嗌個normal shawarma食下，6 dirhams(~HKD12)一條，配上一杯10 dirhams既木瓜汁就夠飽。不過如果係成年男士，應該只夠攝牙罅。

哩隻shawarma同喺埃及、以色列食過既有啲唔同，做法似乎比較簡單。

餅裡面只夾雞肉同酸奶醬，但已經好香好惹味。

杜拜博物館入口

博物館原本係一個城堡，叫Al Fahidi Fort，所以要去博物館，可以直接搭去Al Fahidi Metro Station。城堡喺成個杜拜屬於最古老既建築物，喺以往具有軍事作用。

因為杜拜小國位於波斯灣旁，以前喺海事方面既防守同樣重要。

城堡曾經有用作監獄、製造兵器。後來阿聯酋成立，就改建為博物館。

傳統阿拉伯咖啡壺，1 dirham銀仔上的圖案

一入去就見到售票處同一大堆陸客，相信哩個博物館對旅行團黎講都係必遊。

位置靠近市中心、入場費超平、即使大媽們唔多識睇英文，都有栩栩如生既展品睇。

可以將一班團友放低，唔係淨係去行old souk（舊市集）、大商場、高樓大廈，不失為一個唔會太悶既歷史文化景點。

只需3 dirhams，約hkd 6，內容同設計都無渣流攤，實在抵到爛。

一開始係類似開放博物館既部分，睇傳統阿拉伯建築。

傳統廚房

傳統睡房

頂部設計可以將風引入室內，不過冬天就不宜久留。

圍喺腰部樂器，隨擺動而發出聲音

戶外展出 以前用作來往新舊城區船隻

喺兵器區發現一間賣立體皮藝品既紀念品舖，三位菲籍員工話哩樣技術擁有專利權。

老實講我覺得幾特別，佢地話出面買唔到嫁，有時間可以睇下。

突出部分係硬既，店員大概解釋佢地係用一個模黎整，不過我都唔多明點解啲皮可以整到咁。

七隻駱駝代表七個酋長國，第一隻首領Abu Dhabi 阿布札比，第二隻代表Dubai 杜拜。

連相框的確精緻，賣一百多dirhams

 間舖名為creative leather art，個人認為比起一街都係既紀念品更特別，不過我搵唔到佢地既官網。

行完地面層，博物館重頭戲係地下展館，將杜拜小國掘起歷史由1950年開始講起。

阿聯酋係七個酋長國組成，其中最出名、被認為穆斯林教之中最開放既當然係杜拜。

甚至可能有唔少人聽過杜拜哩個名，多過阿聯酋（全名為：阿拉伯聯合酋長國）。

亦因為中東地方予人感覺係石油大國，大家好容易誤會杜拜單靠買賣石油就咁有錢，闖出今日名堂同地位。

實際上，阿聯酋之中，佔地最多、石油量輸出最多既酋長國係阿布札比。

杜拜一開始只係漁業小國，單靠貿易。1960年後開始發現、買賣石油，不過石油量唔多，發展單一亦會令國家走入死胡同，所以真正支持經濟既係房地產、旅遊等等其他產業。

2017年4月 哈里發塔

就喺哈里發塔興建期間，杜拜遇上經濟危機，資金不足，整個工程要喊停。

但杜拜酋長堅持繼續，唯有向阿布札比酋長借錢。

於是，原本座塔應該叫「杜拜塔」，改以阿布札比酋長個名「哈里發」命名。

今日哈里發塔能夠成為全球最高大廈、杜拜地標，阿布札比功不可沒。

所以到底邊個先係真正有錢？可想而知。

傳統阿拉伯人喜好之一：抽水煙

 

阿聯酋成立之前，杜拜並無正式學校。「老師」叫Mutawa，喺Katateeb教授年青人經文、知識，屬於導人向善既角色，非常受人敬重。

杜拜作為沙漠與綠洲間既地方，生物會有特別習性。日頭天氣太熱，沙漠生物傾向夜行。

詳細留待各位探訪。

 

咁到底初期杜拜係做咩既呢？

地理位置鄰近波斯灣，最初都係漁業、採珠業。

傳統採珠人只會用夾夾住鼻、腳上綁繩，就潛到水底。

傳統開蠔用具

傳統採珠人

採珠、量度用具，最底三個兜用作篩選珍珠大細 

雖然阿拉伯婦人主內，但仍然會幫忙做買賣漁業生意

行完一個個區，最後又係紀念品時間，哩間只屬普通。

杜拜博物館內容豐富，當日我大概行左兩個鐘左右。

如果對哩個奇異沙漠小國既歷史、文化等等有興趣，不妨一訪。

附近亦有唔少景點，可以安排做同一日行程。

杜拜博物館（Traditional Architecture Museum）

地址：Al Fahidi St, Bur Dubai

Opp. Grand Mosque

交通：地鐵最易搭，Al Fahidi 地鐵站比較近