201709✈埃及｜尼羅河奇遇記．埃及七大初體驗

埃及並非一個可以容易推薦比人自助遊既地方，跟團當然省事少麻煩。不過為左慳錢、增加不同體驗，就嘗試用比較地道既方式去旅行。除左肉眼真正見到金字塔，大概列出印象中哩個旅程七項比較印象深刻既事。

有記得再後補，每一樣都可以再打成一篇。

（一） 兩日一夜 黑白沙漠露營

埃及司機們正準備晚餐

中秋節正日就喺白沙漠露營過夜，意料之內凍到pk，真係連帳篷都無。

淨係訓喺床墊上面再笠個睡袋，個身暖，塊面好凍。

訓到半夜三、四點凍醒，當時月亮無咁光同移位之後，終於見到滿天星星。

隔離床有兩個內地年輕男女(經一日一夜觀察，似乎曖昧中)，三更半夜仲行去沙漠曬月光談情說愛。

凍撚到咁都走出去，愛情魔力之大。

訓醒feel到成塊面鋪左一層沙，撥一撥開就起身搵舊大石遮住痾尿。

突然覺得有啲沙都係混住尿......

（二）從北到南，跟本地人搭過夜火車

由開羅到阿斯旺，要搭約13個鐘既過夜火車。

官方由開羅到阿斯旺既過夜火車只有一班，100USD一晚，包兩餐，有床訓，聲稱專為遊客而設，特別安全。

不過100美金實在太貴，以埃及物價而言實在好鬼over，於是我地嘗試搭普通埃及人搭既火車。

有網友們試過去拉美西斯大火車站直接買非官方火車飛，結果職員拒絕。

亦有網友試過唔買車飛，上車再補飛，查飛叔叔並無特別查問。佢地成功用普通埃及人價錢買到。

於是我地照辦煮碗，連問都無去問。

結果好on9地因為無買車飛，跳左上去先補飛，竟然多人到真係無位坐。

不過塞翁失馬，喺火車裡飄盪，意外結識到埃及朋友仔。

（三）嚇L死人樂蜀（中台譯路克索）熱氣球

同一堆大陸團友同一個籃，當日我完全感受到死神真係離我好近好近。

第一次搭熱氣球，先發現原來真係任何安全設備都無。

有個肥仔不停喺個熱氣球籃裡面跳跳跳，又有個大陸團友掉個水樽落街。

望住旋轉自由落體既水樽，我真係好撚驚自己會係下一個，再加上個熱氣球一路飛一路land唔到。

Captain講左句 'I hope that we can land because we are out of gas.' 果下真係想大嗌fml。

我向你保證，玩熱氣球真係驚過玩skydiving。

（四）隨時應付騙子、同埃及人(商人)嗌交

大約係每日都會發生既事，去到中間已經嗌到唔想再同佢地講野。

佢地商人賺錢既手法就好似點都要呃你少少錢先安樂，而唔多識講英文既埃及商人就好老實。

其中一次詳見 ＞ 20170928 十日埃及．尼羅河奇遇記．吉薩駱駝客騙局

（五）不停比錢參觀人地個墳墓

帝皇谷照片好少，因為裡面基本上唔可以影相。

例如：樂蜀帝皇谷裡有超過三十個墓穴，跟團入去睇左三個，裡面既壁畫非常精彩。

為左保護壁畫上既顏色，內部禁止影相，即使比錢都無得買攝影票。

（六）被眾多屍體(木乃伊)包圍

喺埃及開羅博物館，啲棺木同文物多到無辦法好好咁放置，成堆棺木hea曬出黎疊高高。

另外設有木乃伊館，要額外比錢參觀。可以親眼見到佢地既頭髮、指甲仍然保存得好好。

（七）搭帆船 (felucca)

尼羅河上搭帆船本來係一件幻想中幾古典、浪漫一件事，就似可以穿梭到古埃及一樣。

可惜今時唔同往日，哩次搭船又係一個麻麻地既經驗。

本身比埃及人呃左而不自知，明明叫佢帶我地去A點，佢就帶我地去個B點。

第二日佢見到我地，仲想叫我地再搭，我地拒絕。

到第三日發現比佢昆左，諗住再見到，我就實會質問佢，但佢唔見左人。

歸根究底係查資料不足，比騙徒乘虛而入。

撇開騙子唔講，其實唔係經商既埃及人心地都幾好，有唔少人帶過我地路。

所以去埃及前最好做定心理建設，至少應對有準備、情緒唔會太受到影響。